有市民報稱話近日行完山之後總覺得周身唔聚財，質疑「行山抗疫」嘅成效，於是今日我哋派咗法證嘅同事，呀，唔係，係綠惜地球嘅同事，上咗近日旺過旺角嘅獅子山郊野公園一帶搜證，結果發現大量以下可疑物品，令行山抗疫活動有機會反效果變成傳播病菌嘅場所 ！
呢批物品包括：
物證一：口罩
今日8公里路程，我哋發現咗40幾個隨地棄置嘅口罩，車輛可達的山路、郊野公園入口係重災區！係人都知口罩充滿著口水，亂咁掉，仲唔係散播細菌？
物證二：紙巾
天呀，短短8公里路程，我哋響山徑邊執到近800張用過嘅紙巾！紙巾通常用來抹鼻涕、抹咀，屬於個人衛生垃圾，一樣帶滿細菌，大家唔該唔該唔該唔好通山亂掉啦！
物證三：煙盒及煙頭
尋晚馬鞍山又發生大型山火，煙頭係其中一個山火危機，希望大家上山食少支煙，留返個健康嘅肺用來抵抗肺炎！
物證四：果皮/廚餘
麻煩大家唔好再藉口話呢啲可以自然分解。一塊橙皮可以長達兩年先完成分解，一個蘋果芯又會吸引烏蠅、昆蟲及細菌，未分解就已經搞到成個山都污糟邋遢！個個都係咁亂掉，邊仲會有乾淨嘅環境比大家行山？唔該衛生啲，自己帶落山啦！
物證五：膠樽&塑膠食物包裝
塑膠為禍係人都知，你掉響山坡，幾百年都分解唔到，動物又會執去舔，你自己反省下啦！
後記：
1. 感謝今日幾位義工捱義氣同行，幫手將執到22kg嘅垃圾一齊搬落山，送去垃圾站銷毀，響呢個緊張時勢都咁有義氣，多謝佢哋！
2.今日我哋都撞到唔少行山人士自發上山執垃圾，仲有漁護署叔叔同食環阿姨密密執，辛苦晒大家，不過最希望都係每個人自律、文明，自己垃圾自己帶走 啦！
3. 除咗帶走垃圾，醫生都有講，防止新冠狀病毒人傳人，最好就係相隔6個階磚的距離，行山想安心除低口罩，最好唔好一窩峰去逼爆幾條行山路線啦！
版權: